Më 12 qershor 1999, Kosova u çlirua nga një regjim që për vite me radhë ushtroi dhunë sistematike, krime dhe spastrime ndaj popullsisë civile shqiptare. Kjo datë shënon triumfin e lirisë mbi shtypjen dhe kthesën historike drejt paqes, demokracisë dhe shtetndërtimit.

Në këtë përvjetor, përulemi me nderim para sakrificës së dëshmorëve dhe të gjitha viktimave të luftës, duke rikujtuar se liria e Kosovës është ndërtuar mbi vuajtje, qëndresë dhe sakrificë të jashtëzakonshme njerëzore.

Për IKKL-në, 12 Qershori është ditë feste, reflektimi dhe përgjegjësie institucionale për të ruajtur kujtesën kolektive, për të dokumentuar të vërtetën dhe për të mos lejuar që krimet e kryera gjatë luftës të harrohen, relativizohen apo mohohen. E vërteta historike është themeli mbi të cilin ndërtohet drejtësia, ndërsa kujtesa është garancia që krimet e së kaluarës të mos përsëriten kurrë.

E gëzofshim lirinë e Republikës sonë.