IKKL priti sot në takim Këshillin Koordinues të Asociacioneve të Familjarëve të Personave të Zhdukur. Në këtë takim morën pjesë kryetari i Këshillit, Ahmet Grajqevci, përfaqësuesi i Komisionit Qeveritar për Personat e Zhdukur, Kushtrim Gara, si dhe përfaqësues të shoqatave nga mbarë Kosova: Vildane Mulaku, Xhyla Haziri, Kumrije Karaqica, Xhemile Morina, Sali Muhaxheri, Agron Limani, Shaip Pireva dhe Lutfije Ademi Vokshi.
Qëllimi i takimit ishte informimi i drejtpërdrejtë mbi ecurinë e punës së Institutit dhe shqyrtimi i procesit të administrimit dhe ruajtjes së dokumenteve të dorëzuara nga Këshilli dhe shoqatat.
Drejtori Ekzekutiv i IKKL-së shprehu falënderim të veçantë për Këshillin, i cili më 17 shkurt 2024 ishte institucioni i parë që dorëzoi materialet arkivore në Institut.
Ai theksoi se këto dokumente do të ruhen me standardet më të larta profesionale dhe se Instituti mbetet i përkushtuar ndaj transparencës, bashkëpunimit dhe avancimit të procesit të dokumentimit, me synim që të kontribuojë edhe në zbardhjen e fatit të personave të pagjetur gjatë luftës në Kosovë.
