Instituti i Krimeve të Kryera Gjatë Luftës në Kosovë dhe Universiteti “Isa Boletini” në Mitrovicë kanë formalizuar bashkëpunimin institucional përmes nënshkrimit të Memorandumit të Bashkëpunimit, me qëllim zhvillimin e aktiviteteve të përbashkëta në fushën e hulumtimit shkencor, edukimit universitar dhe angazhimit akademik.

Memorandumi u nënshkrua nga Drejtori Ekzekutiv i IKKL-së, Dr. Atdhe Hetemi, dhe Rektorja e Universitetit “Isa Boletini”, Prof. Dr. Nurten Beligradi-Deva, duke vendosur një kornizë bashkëpunimi për projekte hulumtuese, aktivitete shkencore, si dhe përfshirjen e stafit akademik dhe studentëve në trajtimin e çështjeve që lidhen me krimet e kryera gjatë luftës në Kosovë.

Ky bashkëpunim synon forcimin e lidhjes ndërmjet kërkimit shkencor dhe arsimit të lartë, në funksion të dokumentimit të së vërtetës, ruajtjes së kujtesës kolektive, rritjes së ndërgjegjësimit shoqëror dhe avancimit të bashkëpunimit institucional.