Pas organizimit të Forumit Zá n’Kujtesë me temën “Helmimet në Kosovë 1990–1992”, rezultat i bashkëpunimit ndërmjet IKKL-së dhe MAShTI-t, në Bibliotekën Kombëtare të Kosovës “Pjetër Bogdani” po qëndron e hapur ekspozita me dokumente origjinale, fotografi, raportime ndërkombëtare dhe dëshmi që vërtetojnë helmimet masive të mijëra nxënësve shqiptarë në vitet e 90-ta një prej kapitujve më të dhimbshëm të historisë sonë moderne.
Gjatë këtyre ditëve, ekspozita është vizituar nga studiues vendorë e ndërkombëtarë, studentë dhe përfaqësues nga vende si Italia, Turqia, Portugalia e të tjera. Vizitorët janë informuar nga zyrtarët e IKKL-së rreth kësaj ngjarjeje dhe misionit të institutit për dokumentimin dhe ruajtjen e të vërtetës historike.
Ekspozita do të qëndrojë e hapur deri më 5 dhjetor 2025, ju ftojmë ta vizitoni për të parë nga afër dëshmitë e një prej ngjarjeve më tronditëse që i parapriu luftës në Kosovë.
