Këtë javë, Instituti pati kënaqësinë të bashkëpunojë me individë dhe profesionistë të ndryshëm, të cilët kontribuan në mënyra të ndryshme në procesin e dokumentimit dhe ruajtjes së kujtesës historike. Vlerësojmë bashkëpunimin dhe gatishmërinë e secilit për të ndarë përvoja, njohuri apo materiale me institutin tonë.
Në Tiranë, u realizua një takim me z. Musa Ulqini, ish-Ministër i Informacionit, i cili ndau përvojat dhe reflektimet e tij mbi periudhën e luftës dhe sfidat e informimit publik në kohë krize. Po ashtu, ai dorëzoi dokumente dhe materiale për institutin.
Znj. Habibe Gerxhaliu, mësimdhënëse në shkollën fillore “Lummadh”, ndau dëshminë e saj si e mbijetuar dhe dëshmitare e Masakrës së Studimes së Vushtrrisë më 2 maj 1999, ku forcat serbe i vranë bashkëshortin, Skenderin, dhe vëllain, Imerin. Ajo përshkroi ngjarjet e asaj dite dhe rëndësinë e dokumentimit të tyre.
Z. Veton Guri nga fshati Nikaj, komuna e Kaçanikut, rrëfeu për pasojat e shpërthimit të një mjeti shpërthyes të vendosur nga forcat serbe më 3 mars 2001, ku ai dhe dy vëllezërit e tij, Arbeni dhe Astriti, pësuan lëndime të rënda fizike gjatë kohës që ishin ende fëmijë.
Z. Hashim Regjepi dhuroi për Institutin një libër që dokumenton përjetimet e bashkëfshatarëve dhe familjës së tij, gjatë dhunës dhe masakrës ne fshatin Celinë.
Prof. Dr. Agim Zogaj kontribuoi me dy libra autorialë që trajtojnë aspekte historiko-politike të periudhës që i parapriu luftës në Kosovë.
Znj. Luljeta Pula, veprimtare e çështjes kombëtare dhe profesoreshë në Universitetin e Prishtinës, e cila ka punuar vazhdimisht nga viti 1968 deri në vitin 2000, i dhuroi Institutit katër ekzemplarë të librit “Helmimet – Krimi dhe Mashtrimi” në gjuhën shqipe dhe serbokroate. Po ashtu, ajo dhuroi edhe material digjital: një orë video-incizim, dokumentim të helmimeve të nxënësve të Kosovës.
U zhvillua gjithashtu një takim me veprimtarin e njohur z. Naim Zhitia, i cili ka luajtur rol të rëndësishëm në ruajtjen dhe promovimin e kujtesës historike të rezistencës shqiptare ndaj regjimit serb në vitet 1980. Ai ka shprehur gatishmërinë të kontribuojë në IKKL me dokumente që dëshmojnë padrejtësitë e bëra ndaj shqiptarëve.
