Gjatë javës së kaluar, IKKL-ja vazhdoi mbledhjen e dëshmive dhe dokumenteve nga periudha e luftës në Kosovë. Qytetarë nga komuna të ndryshme kontribuuan me materiale të vlefshme.
Në fshatin Ramjan, të komunës së Vitisë, Shkurte Rexhepi, Fatime Emerllahu dhe Shqiprim Rexhepi dorëzuan fotografi të shtëpive të tyre të djegura, me mbështetjen e Kryetarit të fshatit, z. Kadri Ismajli. Nga e njëjta komunë, z. Adnan Ahmeti, kontribuoi me fotografi të dëmeve materiale dhe dha dëshmi për ngjarjet e luftës në fshatin Smirë.
Nga komuna e Mitrovicës, Shukri Begu, ish-pjesëtar i UÇK-së nga zona e Shalës, dorëzoi librin e tij autorial “Kujtime dhe Fragmente të shkëputura nga Ditari i Luftës”.
IKKL-ja mori dëshmi për Masakrën e Landovicës, nga dr. Avdirrahim Ajazaj dhe dr. Shkelzen Gashi. Dr. Ajazaj, ndau përvojat e tij si mjek gjatë luftës, ndërsa dr. Gashi, i mbijetuar i masakrës, dha dëshmi për mizoritë e përjetuara.
Elheme Shyti, nga fshati Oshlan, i komunës së Vushtrrisë dha një deklaratë të rëndësishme lidhur me vrasjen e burrit të saj dëshmor, Mustafë Shyti. Nga Ferizaj, Ekrem Hetemi, dorëzoi fotografi, raporte mjekësore dhe dëshmi si i plagosur nga policia serbe.
Prof. dr. Agim Zogaj, profesor universitar dhe gazetar gjatë luftës, premtoi bashkëpunim dhe dorëzimin e dy librave që dokumentojnë ngjarjet e luftës. Haçif Ilazi, ish i burgosur politik dhe aktualisht Drejtor i Burgut të Prizrenit, dhuroi librin “TMERRI KA EMËR” që dokumenton përjetimet në burgun e Dubravës.
Esat Shala, kontribuoi me 100 kaseta VHS që dokumentojnë krimet e luftës në Kosovë, ndërsa Blerina Bytyqi nga SHBA nënshkroi procesverbalin për grumbullimin e materialeve dhe intervistave nga viti 1999.
Një qytetar nga Podujeva dorëzoi dokumente të lëna nga babai i tij, që dëshmojnë për praninë serbe në Kosovë. Amir Ibrahimi, kontribuoi me dëshmi për dëmet materiale të familjes së tij.
IKKL-ja vazhdon të mirëpresë kontribute të tilla që ndihmojnë në dokumentimin e historisë së Kosovës.
