Prezantimi i Agjendës së Konferencës dhe Aspektet Tematike nga znj. Greta Avdyli (PhD Cand.), Udhëheqëse e Divizionit për Hulumtime Akademike.
Dje u shënua një hap i rëndësishëm në adresimin e dokumentimit dhe ndjekjes penale të krimeve të luftës në Kosovë, me prezantimin e strukturës tematike të Konferencës Shkencore Ndërkombëtare nga znj. Greta Avdyli.
Në fjalën e saj hyrëse, znj. Avdyli theksoi rëndësinë e bashkimit të akademikëve, ekspertëve të drejtësisë, studiuesve dhe përfaqësuesve institucionalë për të zhvilluar diskutime kyçe mbi drejtësinë dhe llogaridhënien historike. Kjo konferencë shërben si një platformë për një analizë të thellë akademike dhe juridike të krimeve të luftës, duke riafirmuar angazhimin e Kosovës për të vërtetën dhe drejtësinë.
Agjenda është e strukturuar në tre sesione kryesore tematike:
Krimet e kryera gjatë luftës në Kosovë – Analizimi i natyrës, shkallës dhe ndikimit të dokumentuar të këtyre krimeve.
Dokumentimi dhe hetimi i krimeve të luftës – Trajtimi i proceseve thelbësore për vendosjen e së vërtetës dhe sigurimin e llogaridhënies.
Sfidat ligjore dhe politike në adresimin e krimeve të luftës – Eksplorimi i kuadrit ligjor dhe politik për garantimin e një drejtësie efektive.
Konferenca ka mbledhur studiues nga institucione prestigjioze ndërkombëtare, përfshirë:
Universiteti i Amsterdamit
Universiteti i Dublinit
Universiteti i Nju Jorkut
Universiteti i Bournemouth-it
Universiteti Charles
Peace Research Institute Oslo
New Europe College
Universiteti i Prishtinës
RIT Kosova
Akademia e Shkencave dhe e Arteve e Kosovës
Një nga rezultatet kryesore të kësaj konference do të jetë publikimi i një Edited Volume, i redaktuar nga Prof. Aidan Hehir dhe Prof. Furtuna Sheremeti, që do të përmbledhë punimet e studiuesve pjesëmarrës. Ky botim do të jetë një burim i rëndësishëm për akademikët dhe vendimmarrësit në fushën e drejtësisë tranzicionale dhe të drejtës ndërkombëtare.
Teksa Kosova vazhdon rrugëtimin e saj drejt drejtësisë, kjo konferencë riafirmon detyrimin moral dhe institucional për të siguruar që e vërteta të mos zhbëhet dhe që drejtësia të triumfojë.
Urime të gjithë organizatorëve, studiuesve dhe pjesëmarrësve për përkushtimin e tyre në hedhjen e dritës mbi këto çështje jetike.
