Sot stafi i IKKL-së realizoi një prezantim të punës dhe veprimtarisë së institucionit në Kolegjin AAB. Në këtë aktivitet morën pjesë studentë dhe profesorë, të cilët u njoftuan më nga afër me misionin, aktivitetet dhe punën e deritanishme të Institutit.
Gjatë prezantimit u paraqitën materiale që posedon IKKL, përfshirë dokumente origjinale, fotografi autentike, intervista, video-dëshmi dhe materiale të tjera arkivore që dokumentojnë krimet e kryera gjatë luftës në Kosovë. U theksua rëndësia e këtyre burimeve si dëshmi historike, si dhe mundësia e përdorimit të tyre në projekte kërkimore, edukative, artistike dhe audiovizuale, me qëllim ruajtjen dhe përcjelljen e së vërtetës historike.
IKKL shpreh mirënjohje për Kolegjin AAB, profesorët dhe studentët për pritjen, interesimin dhe gatishmërinë për bashkëpunim në të ardhmen.
